步兵搭船第二站 - 荔枝莊

未上船影下隻靚船先。




未上碼頭已有5隻黃狗歡迎，好在同船有高手識路，一落船擺底雞翼尖。D狗仔好乖的。除左吠你之外唔會有咩反應。餵完野食平安釣魚。



 唔識比反應。



咩玩法



太大風，決定掟沙灘內彎。大量沙礸(圖為左口)，釣夠食玩碼頭底。



一口大野，以為執到隔夜野，一抽成個約組無左。轉布腳，再黎就無甩拖，雞泡都要抽你上黎!好力水











同場加映，6點船前的日落。圖片出自華為Nova 3，有AI稍為執相。但現場睇其實相差不大，真係好靚。

釣魚編，深涌碼頭。

作為釣魚新手的小弟，以步行黎計當然要親身嘗試釣魚地點。
不打粉，主力最熟手既3.5主3號副腳波子壓底。





失望而回。同場打粉幾位師兄，D魚就比較似樣，有鯧魚有石剎有黑立。但比我想像並不算大咬。

轉變，北角碼頭。

又黎北角碼頭玩。自從汽車碼頭長期泊左躉船個底都出現左變化。

由上年同一時間，一晚起10幾條坑廉，到今天第1條魚竟然係沙礸。感覺污泥底變成左沙底。波子壓底拖餌都感覺到左變化。感覺到少好多怪獸游埋黎。拖底玩下沙礸玩返個零2個鐘都夠餐食

八爪魚寶寶

陽光普照，可惜了上班一族無法全日去玩。都係去返自己最近既釣場。3.5主3號腳T環棄鉛出。

第1次秋刀都咬。真係唔知八爪仔到底係食咩。

玩完佢一輪掟回大海。

二條都係常客，不過斷左一條斤頭都幾灰。感受唔到係咩魚，但chok斷鈎。又上左一課。

墨魚初Gor

日出康城，Chok墨聖地

胆粗粗買支墨魚燈去下墨魚

深水埗街尾店買八爪鈎同米仔去試下。

唉墨魚真係幾睇風向及溫度，經驗技巧不足之下。

成晚得一條仔都好啦返屋企拎黎煮下公仔面。

但係真係要掌握好支竿。

用手竿Chok打水較容易，但個人比較少用，總係覺得Chok個野反應因為支竿軟慢左。

而感覺上，今年康城埋邊既墨魚好似對比上年少左好多。

點都好，愛護環境，唔好整到成地垃圾同墨啊大家。

北角碼頭 2018-6-20 (靜水到北角碼頭散心)

北角碼頭尋魚日，靜流水退時間釣。蝦肉棄鉛沉底釣。

又同我上條斤頭油鎚。點解咁鬼多架。仲要同我嘔到成地都係污鬼糟。

3號主唔記得拎撈磯都上到水，有運。

真係估唔到呢家個邊多油鎚到咁。

牛一之戰

生日牛一前一天，硬著頭皮請日假去玩下。去了青龍頭附近一帶搵魚類朋友。丸九極蝦粉腌曬白蝦肉去試玩青龍頭附近釣點。中午大流時間完全飛機流，岸拋30G都頂不順要收竿休息下。呢附近釣點石底，如果波子壓低玩足全日估計收竿鈎底機會率有30-40%。魚帶餌走拉慢少少都容易卡石。而拋出少少都有細魚仔搞餌。轉用棄鉛法，唔卡鈎就卡鉛。總之去得戈個位釣就帶定多D火藥。魚仔食餌好細口，適而用幼線，2號主，1號或1.5碳腳。子線長少少大約150-200越漂越好。無打粉全日都中魚毛仔，最大個條連尖仔大約手掌大少少。其它紅衫B=]但自己小心啦戈個位，如果想探就量力而為嗱。我都係企易釣位，有D位要爬既就自己判斷嗱。長釣長有，命仔要緊。

釣魚行裝推介。(收納盒 / 分類盒 / 照明燈具)

悠閒岸釣配備:

Daiwa 釣魚置物箱 => 2000R，可放下圖最少6個kizakura。通常我放1個。外加一個鉛盒，一卷後備線。放完單邊右邊再放鉸。帶埋餌行得。上層放支細蚊怕水及廁紙，輕鬆出發。

任你點分類的收納盒，可以完全免去魚鈎因內層不密封而混合溝亂的情況。買左唔後悔

一支燈，作用晚間照明，只係照個盒，附送鐵片。由於燈具上設有磁石，而附送鐵片本身有穩固膠紙，小弟將鐵片貼左係蓋底，一打開蓋按個掣開燈，方便無比。

此配備作參考，牌子不一定及可於本地購買。下作淘寶連結推介一下。

利申:本人曾購買了並仍在使用上文三件配備。

收納盒
kizakura

燈

Chok墨魚季節初體驗

船釣(未入曬季，好細隻)

入左季岸釣都可以拎返屋企煮餐公仔面架

又黎到盛夏，釣開魚既朋友可能未必有興趣 - Chok墨魚。
配備:
- 強勁儲電散射燈(如用聚光燈效果絕對唔好)
- 八爪鈎(連夜光條)
- 魚竿 / 手排
- 魚絲(個人愛好用PE，一拉直上，唔會似有拉長有彈性)
- 冰箱(只限帶回家食用者)
- 蚊怕水 / 蚊香
全港水域基本上都有架嗱，有的愛坐船搵排口釣，有的岸邊釣。小弟咁岩船又玩過岸又玩過。個人認為出船chok墨魚係幾貴的。而且都未必保證可以比岸邊多，但普遍chok到既大細平均會比岸邊既大條。小弟Chok墨最愛就係康城，都係個句，市區。直駁。
技巧方面，網上都有好多方法，試過曬，最實際命中最高，放大約1米至1.5隱約可見八瓜鈎，會見到墨魚既影慢慢靠近隻鈎，留意住條線及鈎開始帶即Chok，都好大機會中。或者心急D未帶線個影重疊左既時間Chok，都有機會。總之行行出狀元，但最緊要既，都係防蚊防虫，短時間chok唔到，都要有準備長期作戰，唔好比D蚊咬走。

釣魚中的樂趣，斷魚也要向好看。

又是我最愛的北角碼頭。近近地去佳寶買返pack秋刀魚去釣下魚。

今次波子壓底吊法。都係釣到既老朋友釘公仔，結論都係放生。

釣魚經驗唔多，一路以來雖然日子好短但係睇住北角碼頭呢個釣點不論係魚獲同水深都無咩改變。個底依然係咁唔錯，無咩掛底。但自從躉船長期泊係度之後，開始竟然釣到沙礸。Anyway過程先係最開心。可以放鬆下個人，而釣魚釣左一年，仍然需要學習，竟然無留意子線傷左，中左一條大野不停出線。以拉扯力度同節奏應該係一條大約二斤左右油鎚，線鈎位置斷左。真係既傷心，又是一種學習。

膽生毛釣魚,雨中作樂(此地無魚)戰場

<此地無魚>
四個大字位於油塘工業村排污口。
由於小弟未去過相關釣場,特登去試下點知落大雨,好在隔離有地盤街板可以比到我避雨。

抱住釣唔到魚唔走既心態,去學習下觀摩下。由於試Cue個底好卡,用左棄鉛式釣法。T字環3.5號主3號腳。

真心既,知道個度成日有咸魚,釣釣下都有d心寒。用青虫去玩,有d飛機流既情況,加大鉛。如果想釣大野,我感覺到絕對係有的。十分密口而且都好大力。已經用3號竿。下次會再試蝦仁。可能搏到粗野,最重要係市區臨近😎最尾淨係中到條魚毛仔太大雨走人了。

新人購買釣魚冰箱推介!短途步兵戰鬥

冰箱應用，初學釣魚，一路都有疑問到底釣左既魚點拎走，定放生。亂買左買右買水筒，又seasun乜都買齊。但又唔捨得買最貴的shimano daiwa... 最後終於搵到一個岩我心水既冰箱
Ryobi, 以前個個seasun要拎去釣魚根本係重到災難級。未釣到連冰飲料呢樣個樣都差唔多成8-9KG又無拖車仔，真係慘過拎行李箱。但係呢個，空箱重量3.1KG...成個箱外圍只係380 x 265 x 275。直頭fit到無朋友。如非跟車出海釣一般步兵，呢個絕對係上佳，實測保冷隔熱能力都絕對唔會失禮，頂足一日係卓卓有餘。仲要有我最鐘意既tiffany blue顏色。

淘寶購買無伏位，收貨檢測封邊位完美，各部件十分理想。香港邊度有得買我就真係唔知嗱。但呢個黎講岩曬我D又唔去街既毒宅。價格相宜，外觀精美，質量好，效果有。

當然，好多時都係去靚場先用，碼頭釣起個D真係用冰箱拎返屋企都覺得曬氣力(D水實在太污漕唔敢食)。



購買連結

曾經最方便小弟，又是小弟最愛的市區釣魚主場，但經歷不起市區成長逐漸受污染的釣場。

郵輪碼頭中繼避風港釣魚點。

簡介:九龍灣港鐵站 => 穿過德福廣場Delifrance => 86號小巴 => 兒童醫院落 => 過橋左轉行到中段落去。

現場風景都不錯，有上過衰佬，非洲鰂，烏頭，泥鯭，倉魚，火點。如果係市區想去釣魚，做定常打龜既心理準備。現場水質非常惡劣，如果去玩下都可以。想拎返屋企食既，千祈唔好。此二魚由2017年中釣上的，當時水質屬於惡劣，今年4月中再去釣，水質已更為惡劣，簡值為災難。過下手癮都可以。晚間釣建議不要落磯石(有過不少蛇踪)，在石屎地拋出離邊3米-4米左右就可，建議玩浮針浮波佳。現場並沒有便利店，進入前自顧飲食。

那些年的北角碼頭

 那些年的北角碼頭，我的最愛區域，不是黃小姐就是佬。讓我瘋狂釣魚的一條魚。傻痴痴的等待釣上來後竟然放生了。不知道鱸魚(星佬火水佬花佬)的特性係入侵性品種要滅絕。現在一定有殺错無放過。來投入懷抱吧。
圖中衰佬小弟以死蝦仁釣入，用左南極蝦粉腌。棄鉛釣法離底大約500mm左右。拋出第1條橋躉中間置竿。初時都懷疑是火水，但睇黎係星星。

唔只佬架，沙巴或紅魚類都係架。睇住放生嗱 ._.'

2018-2-21

港現6cm人工「怪魚」沙巴躉　環團恐為自然繁殖後代　毀基因庫

撰文：張雅婷

肉食性魚類　恐成新入侵品種

生態資源及教育中心於去年3月15日於北角碼頭發現身長僅有6厘米長的沙巴龍躉，是本港水域首次發現體積如此細小的的沙巴龍躉。該中心科學事務經理張瑪珊指出，身長小於15厘米的沙巴龍躉，在香港街市或魚市場非常罕見。過往研究指出，沙巴龍躉只可經人工繁殖，但根據沙巴大學（Universiti Malaysia Sabah）最新的研究，沙巴龍躉已能夠在圈養環境中成功自然產卵，他們不排除如此「迷你」的沙巴龍躉是經放生後的後代。

張瑪珊指出，沙巴龍躉是外來的肉食性動物，經花尾龍躉與老虎斑人工雜交而成。牠們成長速度快，只需6至9個月時間就可養殖至一斤重，並可以吃掉其他海洋生物、與本地物種爭奪棲息地及食物資源。她警告，一旦沙巴龍躉在港落地生根及大規模繁殖，將會令其他魚類品種及數量銳減，成為入侵性品種，後果不堪設想。

Quote : https://www.hk01.com/%E7%A4%BE%E6%9C%83%E6%96%B0%E8%81%9E/161391/%E6%B8%AF%E7%8F%BE6cm%E4%BA%BA%E5%B7%A5-%E6%80%AA%E9%AD%9A-%E6%B2%99%E5%B7%B4%E8%BA%89-%E7%92%B0%E5%9C%98%E6%81%90%E7%82%BA%E8%87%AA%E7%84%B6%E7%B9%81%E6%AE%96%E5%BE%8C%E4%BB%A3-%E6%AF%80%E5%9F%BA%E5%9B%A0%E5%BA%AB

毒魚遠離我

毒到無朋友
人釣目標好魚，我卻是毒魚的目標。
釣魚既經歷上，無咩時間去靚靚釣場，多數時間都係碼頭直駁等。
大量毒坑同泥鯭找上門。
佔很大比例，用餌問題吧T_T
會釣魚前真的必需要知清楚海中對我們有害的東西！
A gift from the sea but is poison.

(北角碼頭釣獲)坑廉背棘，胸鰭，硬棘都有毒，帶有毒性，刺中可以收隊浸熱水或去急症。建議配手術鉗解鈎，或剪絲。

(觀塘海濱釣獲)泥鯭一樣，背鰭吉你一下痛你幾個禮拜。T_T

毒魚遠離我遠離我。

初到貴境，學習釣魚，各類趣聞分享。

                                          祝各位魚運亨通，越釣越有！